දියුණුවේ රහස ඔබේ උත්සාහයයි.

                             

                   

          පුද්ගලයකුගේ ජීවිතයේ දියුණුව,ඔහු හෝ ඇය කරන කැපකිරීම මත තීරණය වන්නකි. උපතින් හිස් අතින් පැමිණෙන මිනිසා සමාජයේ කතා බහට ලක්වන, ගෞරවනීය ,පිළිගත්,මනා පෞරුෂයක් හෙබි පුද්ගලයකු වන්නේ ඔහුගේ දියුණුව හේතුවෙනි.දියුණුව එක රැයකින් කළ නොහැකි දෙයකි.මුළු ජීවිතයම පරදුවට තබා උත්සාහයෙන්, කැපවීමෙන්,අවදානම් දරමින් දින සති මාස වර්ෂ ගණනක මහන්සියේ ප්‍රතිඵලයකින් හමුවන්නකි.දියුණුවට යන ගමනේදී සිදුවන කරදර බාධක රාශියකි. සාර්ථකත්වයට පත් වූ චරිත කතා විමර්ශනයේදී ඒ බව මනාව වැටහෙනු ඇත. ඉදිරියට තියෙන අඩියක් පාසාම පැරදුනු තැන් බොහෝය. නමුත් ඒ සියල්ලම සාර්ථකත්වයට බලපාන අභියෝග ලෙස භාරගනිමින් එයට නොබියව මුහුණ දීම මත ඔබට ඔබේ දියුණුවේ මාර්ගය මුණගැසෙනු ඇත.

               පුද්ගල දියුණුව විවිධ වූ පැතිකඩ ඔස්සේ මැනිය හැකිය. හොඳින් අධ්‍යාපනය හැදෑරීම, විභාගවලින් විශිෂ්ට ජයග්‍රහණ ලැබීම, තම ව්‍යාපාර සාර්ථක කර ගැනීම, තමාගේ කුසලතා වර්ධනය කර ගැනීම ආදී නොයෙකුත් කාරණා දැකිය හැකිය.වර්තමාන සමාජය ගත්විට පුද්ගලයකුගේ දියුණුවට අව්‍යාජ ලෙස සුබ පතනවා වෙනුවට අකුල් හෙලන පිරිස බහුලය.දියුණුවේ හිනිපෙත්තටම යාමට නම් ඔබට ඔබගේ ජීවිතය කැප කිරීමට සිදුවේ. එය මානසික පීඩාවක් නොකර තමාගේ අභිවෘද්ධිය වෙනුවෙන් සිතා ගත යුතු තීරණයකි.

                           ලොව දියුණුවට පැමිණි බොහෝ පුද්ගලයන් සිය දහස් වාරයක් ප්‍රතික්ෂේප වීම මැද තම සිහිනය ජයගත් අයයි.සිහිනය මායාවක් නොවී යථාර්ථයක් බවට පත්වූයේ දියුණුව වෙනුවෙන් ගත් උත්සාහයයි.පුද්ගලයකු වංචනික ලෙස එක රැයකින් දියුණු වෙනවාට වඩා වසර ගණනක උත්සාහයේ ප්‍රතිඵලයකින් දියුණු වීම අගනේය.ඒ දියුණුව ඔහුගේ මියයාමෙන් පසුවද කතා බහට ලක්වන කරුණක් වනු ඇත.බඹරා මලින් මලට ගොස් මළ නොතලා මල් පැණි රැස්කොට විශාල වධයක් බඳින්නේද ,වේයා පස් ස්වල්පයක් බැගින් ගෙනැවිත් විශාල තුඹසක් බඳින්නේද, දියුණුවේ රහස උත්සාහය බව පසක් කරවමිනි.

                            අලිබාබා සමාගමේ නිර්මාතෘ ජැක්මා ලොව ප්‍රබලතම  සමාගමට හිමිකම් කියන පුද්ගලයකු බවට පත්ව ඇත්තේ ඔහුගේ උත්සාහයෙනි.සාර්ථක ව්‍යවසායකයන් අතරින් වැඩිම ප්‍රතික්ෂේප වීම්වලට ලක්ව තිබෙනුයේ ජැක්මා ය.චීනයේ දුප්පත් පවුලක ඉපදුණු ඔහු ලැබීම් වෙනුවට ජීවිතයේ නොලැබීම් සම්භාරයකට මුහුණ දුන් අයෙකි.ප්‍රාථමික පාසලට මෙන්ම ද්විතීක පාසලට මුහුණ දෙන විභාගය මොහු තුන් වතාවක් පරාජය වී ඇත.විසි හතර දෙනෙකුගෙන් සමන්විත සම්මුඛ පරීක්‍ෂණයේදී ඔහු හැර අනෙක් සියලු දෙනාම සම්මුඛ පරීක්ෂණයෙන් සමත්ව ඇත.හාවර්ඩ් විශ්ව විද්‍යාලයට දහසය වතාවක් ඇතුළත් වීමට යොමු වුවද ඒ සියලු අවස්ථාවල ප්‍රතික්ෂේප විය.ඒ කෙසේ නමුත් ඔහුගේ උත්සාහය බිඳක්වත් අඩු නොවීය.අන්තර්ජාලය ඔස්සේ චීනය මුළු ලෝකයටම හඳුන්වා දුන්නේ ජැක්මා ය.මුල් කාලයේදී පිස්සෙකු ලෙස හන්වඩු ගැසූ ඔහු ලෝකයක් කතා කරන, පිළිගත්, ගෞරවනීය ප්‍රබලතම ව්‍යවසායකයෙකු බවට පත්වූයේ ඔහුගේ නොමද උත්සාහයෙනි.

                                         දියුණුව කරා යනගමනේදී ළඟා කරගත් ඉලක්ක පිළිබඳ සෑහීමකට පත්වනවා වෙනුවට එකී ඉලක්ක ළඟා කර ගැනීමේදී ඇති වූ බාධක, අභියෝග, පරාජය වූ අවස්ථා, අසාර්ථක වීම් පිළිබඳ නැවත නැවත අධ්‍යයනයක නිරත වීමෙන් ඒවා මඟ හැර උත්සාහයෙන් කටයුතු කිරීමෙන් ඔබගේ දියුණුවට නව මංපෙත් විවර වනු ඇත.උත්සාහයෙන් ළඟා කරගත්ත සෑම ජයග්‍රහණයකම ශක්තිය සෙවනැල්ලක් මෙන් ඔබ පසුපසම ගමන් කරයි. " මම ජීවිතය ජයගත යුතුයි", " කවදා හරි දියුණු වෙනවා"  යැයි කියවමින් වහසි බස් දොඩනවා වෙනුවට ලැබෙන සෑම අවස්ථාවක්ම ප්‍රයෝජනයට ගෙන නිර්මාණශීලීව සිතමින් ප්‍රතික්ෂේප වීම් අභියෝග කර ගනිමින් තම ජීවිතය නැවුම් මාවතකට විවර වෙන මොහොතේ ඔබට වැටහෙනුයේ දියුණුවේ රහස උත්සාහය බවයි.